رواية اشباح المخابرات الفصل السادس بقلم ايه محمد رفعت
عانقت الطائرة سطح المنطقة السرية المنعزلة، وكان "ياسين" أول من هبط منها، يشق طريقه بخطوات حرقت الأرض من شدة غضبه. تهيأت "مرين" للهبوط، وقبل أن تقفز خارج الطائرة أوقفها نداء صارم: — مــــرين!
توقفت مكانها واستدارت للخلف، فوجدت "زين" يرنو إليها والغضب يجوب عينيه الزيتونيتين بشكل قرأته بوضوح. خطف نظرة للخارج يتأكد من ابتعاد ياسين الكلي عن موقعهما، ثم ردد: — سبق وقولتلك قبل كده مليون مرة مش عايز ألمحك واقفة لوحدك مع ياسين، وفي كل مرة بتكسري كلامي!
تنهدت بضيق شديد وقالت: — موقفتش مع حد، هو اللي حاططني في دماغه.
طالعها بثبات قاتل، بل بات وكأنه يتلبس شبح "الأسطورة"، يتخذ نفس ملامح غضبه في تلك اللحظة، رغم هدوء نبرته: — عيب لما تتهميه بتهمة قدام شخص عارف أوله وآخره، زي ما عارفك إنتِ كمان!
واسترسل وهو يحرص ألا يرفع من صوته: — أنا واثق إن غضبه ده وراه مصيبة من مصايبك، ياسين مش سهل أي حد يأثر فيه أو يضايقه.
منحته ضحكة ساخرة ورددت: — هتوقع إيه منك غير كده؟ لازم تدافع عنه ما هو صاحبك وأخوك.
أقحمها بقوله: — وإنتِ إيه؟؟؟
رمشت بعدم فهم، فردد بخشونة: — مهما كان مدى قوة الصداقة اللي بينا، هو بالنهاية اسمه الجارحي وأنا وإنتِ زيدان، يعني العقل والمنطق بيقول إنك أقربلي منه. ثم إن غضبي ده تفسير مبرر أصلًا إنك مهمة بالنسبة لي، نفس مشاعر الغضب اللي هتجيلي لو شوفت شجن أختي واقفة مع شاب.
واستطرد بغضب واندفاع: — سيبك من فرق الشهور اللي بينا، غصب عنك أنا أخوكي ومن واجبك تهابيني وتحترمي كلامي في أي شيء يخص كرامتي وكرامتك!
زوت حاجبيلها بدهشة: — وأنا قللت من كرامتك؟
أجابها بعنف وغضب: — أيوه! لما أشوفك أكتر من مرة واقفة معاه يبقى ده إيه؟؟ بتعجزيني قدامه لأني مش قادر آخد معاه رد فعل لأنه صاحبي!!
واستكمل بقسوة متعمدة: — إنتِ سبق ورفضتيه ورافضة الارتباط بشكل عام أيًا كانت أسبابك، يبقى تعملي حدود ما بينك وبينه.. اللي بينكم هو الشغل وبس، غير كده مفيش! كلامي مفهوم ولا محتاجة أجيبلك الجوكر يوضحلك بنفسه؟!
ربعت يديها أمام صدرها وصوبت نظرة غاضبة إليه، هاتفة بقوة: — لو بتهددني بلغه باللي عايز تقوله، لكن لو بتتكلم معايا كنصيحة أخ ليا فأنا متقبلاها، بس يا ريت زي ما بلغتني بالكلام ده تبلغه هو كمان يعمل حدود معايا.
وتركته وقفظت خارج الطائرة، فزفر بحنق ولحق بها يناديها مجددًا. وقفت وهي تنظم أنفاسها المنفعلة، فإذا به يقترب هاتفًا بابتسامة هادئة: — خلاص متزعلش يا سطا، أنا هشكمه وهعمله وقفة.. مرضي يا مروان؟
شملته بنظرة غاضبة فتعالت ضحكاته وأخذ يشاكسها: — أعملك إيه تاني عشان ترضي عني؟ أختاه، هو إنتِ مش واخدة بالك من عمق العلاقة بينا؟ يعني لا فارقلك إني أخوكِ وابن عمك وصاحبك الوحيد وزميلك في الشغل، ولا فارقلك حتى إني جوز أختك بسكوتة الكوكيز دي؟
ردت بابتسامة ساخرة: — لا، اللي فارقلي إنك مع فريق المغرور ده.
وأضافت بعد صمت: — زين، أنا مش عايزة أطلع مهمات تاني معاه.. ممكن تبلغ عمي من فضلك؟
تفاجأ بما قالت، وسألها بنبرة لطيفة: — ليه يا مرين؟ إيه اللي حصل؟
ارتبكت قبالته، وأزاحت خصلاتها خلف أذنها ورددت بنبرة تحاول جعلها ثابتة: — أنا برتاح في الشغل معاك أكتر، وبعدين إنت لسه قايلي من شوية أحطله حدود، فأنا أكيد مش هعرف أعمل ده وفي شغل هيجمعني بيه.
وتابعت وهي تخفي توترها المباح له: — وبعدين إنت المفروض تحمسني وتشجعني على قراري ده.
قرأ ما تحاول إخفاءه جيدًا وقد علمت ذلك، فتنهدت وهي تهتف بضعف وحزن: — زين، من فضلك بطل تبصلي بصة التحقيقات والاستخبارات دي.
أجابها "زين" بمكر: — لو واثق إن اللي بتقوله صح مش هتخاف من نظراتي ليك يا مروان.
زمت شفتيها بغضب، بينما يتابع هو بخبث: — ما تيجيني سكة ودغري كده، إنت خايف من إيه يا معلم؟
لكزته بعنفوان: — بطل تكلمني بنبرة المذكر دي، وهات الناهية.. هتقدر تعمل كده ولا لأ؟
توقف عن الضحك وقال بجدية تامة: — أقدر طبعًا، بس يا مرين إحنا تيم واحد، اتشهرنا ونجحنا مع بعض، الفريق مش هيكون مكتمل من غيرك ولا من غيره.. زي ما الجوكر والأسطورة اتعرفوا مع بعض، فريق الأشباح اتعرف بينا إحنا التلاتة، حتى لو انضم لينا أي فرد جديد بيفضل بالخانة الفرعية.
واستكمل بينما يشير لها بالتحرك رفقته للداخل: — من رأيي تفكري في قرارك كويس.. يلا ندخل.
كان في طريقه إلى الأعلى، وما إن كاد يجتاز الطابق السفلي للدرج، حتى تسلل له صوت لكمات قوية تجتاح صالة التدريب. استدار "ياسين" يراقب الحلبة المتوسطة للصالة الضخمة، فتفاجأ بمبارزة "الجوكر" و"الأسطورة"، وكأنه صراع أسطوري يقدم فيه كلاهما مهارة عالية في تفادي اللكمات وتصويب هجوم محترف يتفاداه الطرف الآخر بسهولة.. مستوى جعله يراقبهما بانبهار، وكلما ظن أن أحدهما سيتفوق على الآخر فاجأه الآخر بشكل غير مسبوق!
ترسخ داخله الآن جملة أبيه حينما أخبره بأنهما في العمل يتعاملان وكأنهما شخص واحد، روحان في جسد ملتصق. انتزع "رحيم" قفازاته وهو يتطلع إلى "مراد" بابتسامة خبيثة، أنهاها بهمسه غير المنطوق والذي برع "الجوكر" بقراءة حركة شفتيه: — في معجب بيراقبنا!
استدار "مراد" للخلف فوجد "ياسين" يقف مكانه، نظرات عينيه تحفها الإعجاب والدهشة. كان يتمنى أن تصل علاقته بصديقه لتلك الدرجة من التفاهم التي تجعله يتنبأ بكل خطوة تصدر عنه مثلما يفهم كلاهما الآخر. ابتسم "مراد" ورنو إليه يخبره بصوته الحنون: — هتوصل لأفضل من كده كمان يا ياسين.. إنت لسه في أول طريقك بس أنجزت اللي خلاك اختصرت كتير أوي.
هز رأسه، وإنهاك مشاعره جعله مرهقًا، حتى إنه لم يلاحظ نظرات "رحيم" المتفرسة به والتي تسجل تبدله التام فور دخول "زين" و"مرين"، حتى رأى الغضب والسخط يستوليان على حدقتيه.
راقب نظراته المتعلقة بيد "مرين" المحاطة بشاش أبيض، وتهيأت بسمته الشيطانية المخيفة، فإذا به يدفع قفازاته إلى "ياسين" بخبث: — إيه رأيكم تكملوا كلامكم جوه!
التقط "ياسين" القفازات وتطلع إلى "الجوكر" بعدم فهم، بينما يسدد له "مراد" نظرة مندهشة مما يفعله. فأشار له "رحيم" إلى المدخل، واختطف "الجوكر" نظرة سريعة لما يشير له، وبالطبع علم ما يجول بخاطر أخيه فور أن رأى إصابة ابنته والتي بدت سطحية للغاية.
شملهما "زين" باستكبار واستغراب وقال: — تدريب دلوقتي؟! إحنا لسه راجعين!
أتاه رد صارم من ذلك الذي يوليه ظهره: — وصل بنت عمك لأوضتها وانزل هنا حالًا.
ابتلع ريقه بارتباك مزرٍ، وأشار لها أن تتبعه وهو يمشط الدرج بتفحص حتى يمنحها مساحة المرور إن وجد أحد العساكر يهبط الدرج.
بينما بالأسفل، ارتدى "ياسين" قفازاته وتهيأ بوقفته القتالية بمنتصف المنصة الدائرية. طالعه "مراد" بتركيز، وبالرغم من عدم رضاه الكامل عن استغلال أخيه لغضبه المقتاد، إلا أنه ارتضى بالأمر لأهمية تدريبه على التحكم بغضبه الذي يظهر لهما للمرة الأولى؛ فالجميع يعلم أن "زين" يبدي غضبه دومًا على عكس "ياسين" الذي يشهد له تحكمه وثباته الانفعالي الجبار، مما جعلهما يستبعدان تدريبه على تمرين هام مثل الذي سبق وتعرض له "زين" مرارًا، وما زال يجاهد "رحيم" لجعله يتمكن من كبت غضبه ودمجه بالقتال!
تغلب "ياسين" على لكمات "الجوكر" وما زال يعافر لانضباط أنفاسه، وعيناه العسليتان تلقطان حركات "الأسطورة" الذي يجوب الصالة الرياضية عاقدًا ذراعيه أمام صدره وهو يتابعهما بجمود اتبع سؤاله: — فين الولد؟
أجابه "ياسين" وما زال يقاتل "مراد" بحرفية: — زين سلمه للعميد زي ما حضرتك أمرت.
توقفت خطواته الماكرة قبالة حبال المنصة، ونظراته الصقرية لا تحول عنها في محاولة مقصودة ليشتته عن ساحة قتاله حينما بصق سؤاله الخبيث: — مرين اتصابت إزاي؟
غامت عينا "ياسين" غضبًا جعلته يتلقى أول لكمة وإنذار من "الجوكر": — ركز يا ياسين!
سحب عسليتيه اللتين تتابعان "رحيم" وحاول استعادة صلابته على أرض المعركة، بينما يتابع "رحيم" غزوه الضاري: — مخدتش إجابة على سؤالي!
انحنى بجسده ببراعة وعاد يسدد اللكمات لقفازات "الجوكر" الذي يبرع في صد كل لكمة باحتراف قائد ارتفع شأنه بفعل مهاراته، بينما يجيبه "ياسين" بصوت مختنق: — كلب منهم لوى دراعها.
ترك الحبال ووقف بصلابة تخبئ فرحته بالفرصة الذهبية التي قدمت له: — وإزاي مسها وإنت موجود؟!
فشل بصد اللكمة الثانية التي تلقاها من "مراد" في تلك اللحظة، بينما يسترسل "رحيم" ببرود: — الظاهر إن في درس اعتمدت إن ليل يكون شرحه كويس ليكم ونسيت إنه مستحيل هيعملها وفي بنت معاكم في الفريق.
قفز بجسده برشاقة لا تتناسب مع عضلاته، بينما يتساءل: — درس إيه؟
أجاب بابتسامة خبيثة: — درس حماية بعضكم كفريق، وخصوصًا لو كان الفريق فيه بناتي الاتنين!
وتصنع غضبه بنطقه الصارم: — مكنتش أعرف إنها هتتعرض لأي نوع من الأذى في وجودكم حتى لو لخدش بسيط.
لكمة قوية نالها على فكه فسقط أرضًا يتأوه من شدة الألم، فهدر فيه "الجوكر" متعصبًا وهو يعاونه على النهوض مجددًا: — غلط يا ياسين! رحيم بيحاول يشتتك ونجح في ده!
هز "ياسين" رأسه وما زال يحارب الإنهاك الذي يتفشى إلى جسده رويدًا رويدًا. دفع "رحيم" "مراد" للخلف وهو يهدر بانفعال: — متساعدوش يقوم، مفيش عدو هيمد إيده يساعد!
وعاد بلكمه مجددًا بقسوة وهو يصرخ به: — الإيد اللي هتتمد هيكون معاها موتك!
واندفع تجاهه وهو يستطرد: — لازم تتعلم تصب تركيزك على هدفك بدون ما شيء يأثر فيك.
استجمع "ياسين" قوته بالنهوض قبالة "الأسطورة" الذي خلف من ورائه العديد من الميداليات ووسام الشرف على مدار أعوام رحلته، استجمع مع قواه كل تدريب جمعه مع والده وقادته، وفجأة انحنى بساقه يستهدف ساق "رحيم" الذي ارتد للخلف فجأة ونظراته الصامتة تحيط به.
راقبه "مراد" بترقب وارتباك تبدد حينما طرق بيده على كتف "ياسين" وهو يشيد به: — برافو يا ياسين! كل تفصيلة اتعلمتها في الدفاع عن نفسك لازم تفضل محفورة جوه عقلك زي اسمك تمامًا.
وأشار بيده بتحذير: — بس خد بالك، اللي فات كان نقطة واللي جاي تكملة.
عبث بحيرة من غموض "رحيم" غير المفهوم، وقبل أن يستوعب ما يحاول أن يوصله له، وجده يشير له: — اطلع خد شاور وريحلك ساعتين، وانزل إنت وزين على تحت.. هكون بانتظاركم أنا ومراد عشان نكمل باقي التمرين.
ردد "مراد" والصدمة تستحوذ على معالمه: — تمرين إيه وهو في الحالة دي؟!
أشار بكف يده لأخيه وعيناه الزيتونيتان تحملان إنذارًا خطيرًا، واستدار تجاه "ياسين" ببطء، فلم يكن منه إلا أن هز رأسه في طاعة وانصرف للأعلى. بينما واجه "الأسطورة" أخاه وبعنفوان صاح: — ما عادش معانا وقت يا مراد! إنت الظاهر إنك مبقتش متابع ولا تعرف جديد الكلاب دول!
احتقنت أوردته غضبًا وتساءل: — حصل حاجة تاني؟
ضحك باستهزاء: — هتلاقي ملف المصيبة الجديدة في أوضتك فوق يا سيادة الفريق.
نزع القفازات بغيظ وغضب جحيمي انتقل لنبرته: — مش معقول يحصل كل ده وكلنا واقفين عاجزين!
تطلع "رحيم" للأمام بنظرات مقتادة، ويده تشدد من ضغطه على حبل الحلبة الغليظ حتى كاد يقطعه من شدة غضبه: — القضية الوحيدة اللي كلنا وقفنا قدامها عاجزين.. اللي مصبرني إننا المرادي جهزنا ليهم صح.
وتابع ورغبة الانتقام تلمع بمقلتيه: — خمس سنين تدريبات مكثفة ليهم على ايدينا كلنا عشان لحظة زي دي، ولو محصلش مش عارف إحساسي هيكون إيه وقتها يا مراد!
لحق به أخوه، يقف جواره داعمًا بثقة: — زين وياسين هيتغلبوا عليهم يا رحيم، إحنا كلنا بذلنا معاهم مجهود كبير، حتى ليل وعدي وآدهم.. كل اللي مسكوا الملف السري ده وفشلوا في كشف العيلة دي قدموا خبرتهم ليهم من غير ما ياخدوا بالهم.
اعتصر نواجذه من شدة ثورته، وردد باختناق مخيف: — ملف زي ده إزاي نفشل فيه!! ومن بعدنا الوحش وليل العربي وآدهم وأمهر قادة الجهاز!! محدش عرف يوصل لسر العيلة دي.. أنا هتجنن وناري مش هتبرد إلا لما أشوفهم مرصوصين كلهم في الحبس أو التوابيت!
رد عليه "مراد" وحاله لا يقل عنه: — يعني لو كنا نملك دليل واحد كان إيه اللي هيمنعنا من ده ويخلينا نصبر طول السنين دي؟
وأضاف بوعيد غاضب: — إحنا عرفنا غلطنا وهنبعت اللي يصلحه، وأنا واثق إنهم مستحيل هيتغلبوا.. دول أشباح يا رحيم!
شعر بيد تقبض على كفه بحنان وشفتين تقبلهما، ابتسم بنومه وردد قبل أن يفتح عينيه: — حمد لله على السلامة يا سيادة العميد.
ابتسم "عدي" وهو يتطلع لأبيه بشوق، فأفرج "ياسين" الباشا عن عينيه العسليتين، واستقام في منامته يضمه بنفس الشوق المنبعث داخله، بينما يردد بابتسامة ساخرة: — مردتش على مكالماتك عشان متكشفش الليلة، وبردو كشفتها!
تعلق به "عدي" مبتسمًا، وقال بمكر: — عشان كده حضرتك مردتش على مكالماتي!! طيب كنت صارحتني أحسن ما أضرب شكوكي لطريق مسدود.
ابتعد يطالعه بثبات قاتل، قطعه بسؤال: — ورادت فين شكوكك؟
ضحك وهو يجيبه: — كنت خايف إن حضرتك تكون زعلان مني في حاجة وبتعاقبني عليها.
شمله "ياسين" بنظرة حنونة، ثم قال بصدق: — ولو حصل وعملتها مش هعاقبك ببعدي عنك، ياسين الجارحي مش جبان عشان يهرب يا سيادة العميد!
وأضاف بخبث أضحك "عدي": — ولا نسيت انتصاراتي عليك في كل مرة كنت بتعند فيها قدامي؟
هز رأسه وعيناه تدمعان من فرط الضحك: — ودي حاجة تتنسي يا باشا!
واسترسل بمكر وهو يتفحص الأدوية المجاورة له: — المهم طمني، حفيدك مهتم بأدويتك ولا معندوش وقت غير لمهماته السرية؟
يعلم بأنه يحاول أن يبدو خبيثًا في حضرته، بل ويخبره صريحة بأنه يعلم مكان ابنه، فإذا به يعتدل وهو يخبره بخشونة: — أنا معجزتش عشان أحتاج للمساعدة، قولتلك قبل كده أنا لو صبغت شعري هقعدك في البيت!
أمسك ضحكاته بصعوبة، وهز رأسه باحترام وتأكيد لحديث "الدنجوان"، الذي استكمل بمكر وهو يدمر جبهته الشامخة: — وبعدين مين قالك إن حفيدي وراه مهمات بس! حفيدي وراه مهمات وتدريبات احترافية على أعلى مستوى، على إيد الجوكر والأسطورة.
اتسعت عيناه العسليتان صدمة بينما يستطرد "ياسين" ببسمة خبيثة: — حاسس إنك مفتقد أصحابك.. تحب أديك موقع المعسكر السري بتاعهم ولا هتقدر توصل ليه لوحدك يا سيادة العميد؟!
العناصر الإضافية للمقال (SEO Elements)
1. المقتطف التمهيدي (Short Summary)
تتصاعد حدة المواجهات في المعسكر السري بين أعضاء "أشباح المخابرات"؛ حيث يواجه زين رفيقته مرين بعتاب حاد مطالباً إياها بوضع حدود في تعاملها مع ياسين، بينما تُكشف دوافع الصراع الداخلي والخوف على وحدة الفريق. وفي صالة التدريب، يستغل "الأسطورة" رحيم غضب ياسين واشتعاله إثر إصابة مرين ليدخله في مبارزة قتالية قاسية لاختبار ثباته الانفعالي أمام "الجوكر"، ممهداً لكشف الملف السري الأضخم لعائلة إجرامية استعصت على كبار قادة الجهاز لسنوات. وعلى الجانب الآخر في القاهرة، يباغت "ياسين باشا الجارحي" ابنه العميد عدي بكشف مكان المعسكر وتدريبات الأشباح السرية.
اترك تعليقاً على هذا العمل